हुई हिक सिंधी बोली

दुनिया जे हर मानुष वटि आ, पहिंजी बोली।

मिली असाँ खे पिणि सिंधी, हिक प्यारी बोली।

सभ खाँ आहि पुराणी असाँजी सिंधु-सभ्यता

अऊँ सिंधी आ, हुन जी धीय सियाणी बोली 

जहिं थे झूलु झुलाए, लोली दई सुम्हारियो

कहिं कारण सा वई असाँखाँ विसिरी बोली

बार नईं पीढ़िय जा दियनि प्या, रोजु दोरापा

छो न सेखारियव दादी! असाँखे, मिठिड़ी बोली। 

दिण सिंधी सभु मिली मनायो, सिक साँ सरतियूँ

कायम रहे जिएँ पुरखनि जी थाती  बोली

गीत, भजन, गायल संतनि जा बुधो बुधायो

कविताऊँ, ग़ज़लूँ बि लिखनि हीय सुहिणी बोली

सिंधुड़ी छदिजी वई मगर आ फर्ज़ असाँजो

छदिजे कदहिं न पहिंजी अमर निशानी बोली    

शल न अचे हू दींहुं ‘कल्पना’, सिन्धी वंशज

अँग्रेजीअ मेँ पढ़नि, हुई हिक सिन्धी बोली। 

============ 

सुहिणी, दियड़ो बार!

करि सिघो सींगारु, सुहिणी, दियड़ो बार!

आयो शुभ त्योहारु, सुहिणी, दियड़ो बार!

रात अमावस, जणु त लगे पई, चाँड्रोकी 

झिलमिल आ संसारु, सुहिणी, दियड़ो बार!

आई खणी आ, धन जा बेड़ा, दरि लछमी

करि हुन जो सत्कारु, सुहिणी, दियड़ो बार!

बारे फटाका, खूबु ट्रिड़नि प्या दिसु गुलिड़ा 

घरु-घरु आ गुलज़ारु, सुहिणी, दियड़ो बार!

ठाहे खणी अचु, पूजा-थाल्ही, भोगु भरे

चाढ़ि गुलनि जो हारु, सुहिणी, दियड़ो बार!

सुर में आरती, गाइ पिरिनि साँ, तूँ गदिजी

भली कंदो करतारु, सुहिणी, दियड़ो बार!

वरंदी रहे हर सालि  दियारी, हिन जग में 
कटे दुखनि जो जारु, सुहिणी, दियड़ो बार!

=================== 

रीस भली करि

 

रीस भली करि, साड़ु न रखु तूँ

धिके न कहिंखे अगिते वधु तूँ

जेको दानु करिणु थो चाहें

पाण उहो फलु पहिले चखु तूँ

बाहिरि पेरु कढण खाँ पहले

मौसम खाँ बि इज़ाजत वठु तूँ

रखिणो थी जे रिश्तो कायमु

कहिंखे ओधरि दई न घुरु तूँ

कींअ न कंदा हू तोखे पहिंजो

दिलि पहिंजी पिणि खोले दिसु तूँ

सही-गलत छा कयुइ उमिरि भरि

इहो ‘कल्पना’ खुद खाँ पुछु तूँ 

================== 

मोट्यो मींहु अबाणे

मोट्यो मींहु अबाणे, जल जा भरे भँडारा

समुँड्र-नंदियूँ प्या ट्रिड़नि निहारे पूर किनारा

प्यास मिटाए प्राणिनि जी, धरतीअ खे धोई

आसमान जो अङणु छदे व्या बादल कारा

सरहा थ्या सभु खेत, बिजनि जूँ लगियूँ कतारूँ

हारियल हारिनि जी किस्मत जा चमक्या तारा

बण्या सुकल बन सावा, वणु-वणु भरियो पननि साँ

वरी  वरिया  वापस  पहिंजे  घरि  पंछी  प्यारा 

वाका करे लथा झरणा जबलनि जी हँज माँ

नेणनि नूरु वध्यो कुदरत जा दिसी नज़ारा

हुजे ‘कल्पना’ सदिनि सँदी सरही शल धरती
कदहिं मिठे पाणीअ जा खूह न बणिजनि खारा 

============